बाङ्गै भयो पुच्छर-हरि खनाल




काला रात बिते नि पूर्व नभमा झुल्केन घामै किन ?
आस्थाको बिजमा निराश अबता फुल्दै छ दैनन्दिन ।।
हाम्रो नै घरमा सदा समय यो बन्दैछ है दुच्छर ।
ढुङ्ग्रोमा सकिएन सोझिन कसै बाङ्गै भयो पुच्छर ।।

आँखामा घुमिदिन्छ आर्तजनको बेथा सिनेमा सरी ।
हावामा सुनिँदैछ वीरमनको चीत्कार पीडा भरि ।।
रातै छिन् सरिता छ शैल उसतै घाऊ सुकेको छ र ?
पानी भो सपना निरर्थक भयो बाङ्गै भयो पुच्छर ।।

आफ्नै ताल र फालमा उडिरह्यो नेपालमा बादल ।
नौलो ताल भएन घन्किन गयो बेढङ्गको मादल ।।
काला काग उडे सदा शिरमहाँ लाए यहीँ चक्कर ।
लाखौं यत्न गरे नि अन्तिम उही बाङ्गै भयो पुच्छर ।।

आगो दन्दन सल्किदैछ अहिले सल्काउने जिल्ल छ ।
बिर्को ठोक्दछ चेतना किन यहाँ आस्था झनै टिल्ल छ ।।
पर्दा खुल्न गयो सबै नजरमा प्रष्टे कहाँ लुक्छ र ?
हाम्रा फूल चिमोटिए अझ शखे बाङ्गै भयो पुच्छर ।।

हरि खनाल
२०६४÷०८÷०१