अब हाम्रो पालो

प्रवेश पौडेल

देश कता-कता
हाम्रा खोलाको पानीजस्तो लाग्छ ।
कहिल बिस्तारै बग्छ
कहिले गाँवै बगाएर लग्छ
कहिले छाँगाबाट खस्छ
कहिल ढुङ्गामा अल्झन्छ
अनि पुरानो घाउ बल्झन्छ
जरो गाडेर बेला बेला दु:ख दिने
यस्ता घाउ फाल्न मनलाग्छ
मलमपट्टी लगाएर टाल्न मनलाग्छ
मेरो देशलाई आज
रूढीवादी घाउहरू बल्झेको छ
ती घाउहरू फालेर
नयाँ नेपाल बन्छु कि
भन्ने आशमा अल्झेको छ ।


राष्ट्रपति पाएँ भनेर रमाउँछ देश
प्रधानमन्त्री पाएर दशैँ मनाउँछ देश
तर
घाउ बिसेक पारिदिने
संविधान नबन्ला कि भनेर
खुट्टो कमाउँछ देश
हाम्रा खोलाजस्तै
भारतमा बिलाउँछु कि भनेर
च्याप्प पारेर हाम्रो हात समाउँछ देश ।